Asha pachakunapaklla shutichishka, mamallaktata pushak Alfredo Palacioka mana punta nishkakunata paktachishkachu, ashtawankarin, atimanta llukchitukushka, Lucio Gutierrezpak yuyaykunatallata katishpa Ecuadormanta runakunata ashtawanwanmi llakichikun. Ñukanchi allpakunapi tyashka: yakuta, allpa wirata, yurakunata, yachaykuntapash karu llaktakunamanta Corporaciones Transnacionales, charik runakunamanmi ima tyashkata kunakun; Colombiapak makanakuykunamantapash mana achiklla rimashkakunachu. Shinallata, achkakuna mañashka, Asamblea Nacional Constituyentemanpash mana kayachishkachu, chaypak rantika, charik runakunapak munashkata uyashpa, Estados Unidoswan, Tratado de Libre Comerciotarami shuti aspinkapak rimanakun.

CONAIE tantanakuyka, shuk, shuk apukunatami, wacchakunapak mutsuykunata paktachishpa, mamallaktata ñawpaman apachun mañashka; tukuy sami ayllu llaktakuna mashiyarishpa, Ecuadorpi, allilla, kasilla kawsana yuyaywan. Chaymantami, politicapi kashpa, kullki ruraykunapi kashpa, yanakunapak, mishukunapak, runakunapak mutsuykunata rikushpa, llankachun nishkanchik. Mishu shimipi nishpaka Estado Plurinacionalta paktachinkapak ñawpakunamanta kaparinakushkanchi, Abya Yala mamallaktapak kaysayta, yachaykunata wakaychinamanta.

Shina kashkamanta, CONAIE tantanakuyka, wawa wankurikunapak nishkata katishpa, ninmi:

1. Tukuy markakunapi sinchi makanakuykunata kallarinchi, mamallaktata pushakkuna ama Estados Unidoswan Tratado de Libre Comerciota paktachichun, petrolera Oxyta llukchishpa kachachun, allpa wira Ecuador runakunapak makiman yallichun, Asamblea Nacional Constituyentemanpash kayachichun.

2. Tukuy markakuna, Quitupi wankurishkakunapash, makipurashpa, ranti ranti rimarishpa kay jatarikunata ñawpaman apana. Kaparishpa, ñankunata pitishpa, jatun tantanakuykunata wiñachishpa.

3. Chikan tantanakuykunatami kayachinchi, ñukanchiwan pakta kay makanakuykunapi wankurichun, tukuykunapak kawsayta wakaychinkapak.

4. Puchukaypika, Movimiento Plurinacional Pachakutikta mañanchi: Mamallaktata pushak Alfredo Palaciota, juicio politicowan llakichichun, Ecuadorta llakichishkamanta. Jipaka, atimanta llukchishpa mushuk pushakkunata churashpa, paykuna Asamblea Nacional Constituyentemen kayachichun.

Quitupi, killa13 Pawkar Raymi, 2006

POLITICAPI LLANKAKKUNA
ECUADOR RUNAKUNAPAK JATUN TANTANAKUY
CONAIE